Ер адам балгерге барып 9 миллион теңгесінен айырылып қалды

Қызылорда облысы Жаңақорған ауданында бір азаматша жергілікті тұрғынға бал ашып, жолын жеңілдетіп беретінін айтып сан соқтырып кеткен.

Жәбірленушіге келтірілген шығын 8 млн 853 мың теңгені құрайды. Құқық қорғау саласының мамандары халықтың балгер мен тәуіптерге алданып қалатынын айтады. Қазір облыста мұндай деректер жиі орын алады.

Солардың бірі  Жаңақорған ауданында болған осы оқиға. Өзін балгер ретінде көрсеткен әйел жергілікті тұрғынға «жолыңды жеңілдетіп беремін, байып кетесің», - деген желеумен бірнеше мәрте ақша алған. 

Аталмыш алаяқтық дерек сотта қаралып, күдіктінің кінәсі дәлелденді. 

Оның 5 жылға бас бостандығы шектелді. Қазіргі таңда Қызылорда облысында алаяқтық деректері алаңдатып отыр. Үстіміздегі жылдың 7 айында Қызылорда облысында 418 алаяқтық қылмысы тіркелді. Ол өткен жылдың дәл осы кезеңімен салыстырғанда 3,2 пайызға азайған. 

Десе де тәртіп сақшыларын өзгенің меншігін алаяқтық жолмен иелену арқылы азаматтардың құқына қол сұғу деректері орын алып жатқанын ойлантады. «Биылғы 7 айда алаяқтық жасағаны үшін 162 тұлға ұсталды.

Оның ішінде 109-ы әйелдер болып отыр. Оны ашуда бірқатар қиындықтар кездеседі. Атап айтқанда, жәбірленушілер кеш арызданып жатады. 

Биыл осындай 26 азамат кеш арызданған. Олардың арасында 2-3 жылдан кейін полицияға арызданып келгендері бар. Шындығын айтқанда, кейбір азаматтар қазір жеңіл пайда табу немесе мәселені оңай шешу жолдарын іздейтіндігі рас. 

Сондай-ақ, азаматтардың құқықтық сауаттылығы төмен», - деді облыстық ішкі істер департаменті баспасөз қызметінің басшысы Гүлжахан Қайырбергенова. 

Көп жағдайда алаяқтар жер, үй алып беремін деген уәдесін береді. Сонымен қатар, жұмысқа тұрғызамын дейтіндер кездеседі. Тәртіп сақшылары алаяқтарға алданбаудың жолын іздеп әрбір іске сақтықпен қараудың дұрыс екенін ескертеді.      

 
Дереккөз: ҚазАқпарат

Мен жұмыстамын, ал күйеуім тамақ істеп күтіп отырады

«Үйлену – оңай, үй болу – қиын» деген рас екен. Отбасылық өмірде түрлі қиындықтар, жылайтын да, мұңаятын да сәттер кездесіп тұрады. 

Сондайда қолды бір сілтеп, жұбайыңды енді көрместей болып ашуланғаныңмен ашуды сабыр­ға жеңдірсең соңы жақсылыққа ұласатыны сөзсіз.  Бұлай деуіме өз басымнан өткізген жағдай себеп болып отыр.

Біз үйленгеннен кейін көп ұзамай күйеуім ішімдікке салынып кеткен еді. Ит-ыржың күн кешіп жүріп, екі баланы өмірге әкелдім. Ол қатты ішіп кеткенде ажырас­қым келді. Бірақ төркініме барсам, шешем: «Екі баланың обалына қалма. Қанша күн ішер дейсің, бір күні қояр», – деп басу айтып, үйіме қайтаратын. Тарыққан кездерімде аға-жеңгелеріме, тіпті әкеме де білдірмей ақша, азық-түлік беріп тұрды.  Өзім мен балаларымды былай  қойғанда күйеуімнің де үсті-басын бүтіндеп, киім-кешегімізді де әперіп тұрды.

Күйеуім қатты ішіп кеткенде үйге анамды шақыратынмын. Анам келсе, күйеуім бөлмесінен шықпай жатып қалатын да, ол кісі кеткенше қайтып ішпейтін. Тым құрығанда төрт-бес күн болса да құлағым тыныш болсын деп ара-тұра анамды осылайша қонақ етіп жүрдім. Оңашада күйеуімді жамандай бастасам, анам: «Күйеубала жаман емес. Ол арсыз, надан болса, менен ұялмай іше берер еді. Мен келгелі ішпей жүр. Мас кезінде менің көзіме көрінбеуге тырысады», – деп күйеуімнің жақсы жақтарын айтып, мені жұбатып қояды.

Кейін күйеуімнің ақылы кірді ме, ішімдік ішуді азайтып, уақыт өте келе мүлдем қойып кетті. Бір өкініштісі, бауырына зақым келіп, жұмыс істеуге жарамсыз болып қалды. Осылайша отбасымды өзім асырауыма тура келді. Апта бойы жұмыстамын, тек жексенбіде демаламын. Ал күйеуім үйде қазан-ошақтың басында. Тамақ әзірлеп, балаларға қарайды. Қысқасы, екеуміздің рольдеріміз ауысып кетті. Таңертең маған сәттілік тілеп шығарып салады, кешкісін көңілді қарсы алады. Күйеуім үйде отырғандықтан мен де балаларыма көп алаңдай бермеймін. Екеуміздің осындай ынтымағымыздың арқасы шығар, үйімізге береке кіріп, өткен күндердегі жағымсыз жайлар да ұмытыла бастады.

Осы күні бізді ажырасудан аман сақтап қалғаны үшін анама күн сайын алғыс айтамын. Егер өзге әйелдер секілді «қызымды ешкімге қорлатпаймын» деп ажыратып алса, балаларымыз қандай күй кешер еді? Күйеуімнің күні не болар еді? Ойласам, қорқып кетемін. Сондықтан барлық келіншектерге айтарым: ажырасуға асықпаңыздар! Шаңырақ шаттығы үшін аяғына дейін күрессеңіздер, түбінде жеңесіздер.

Айтпақшы, кейде ерлі-зайыптылардың рольдері ауысып кететін кездер де болып тұрады екен. Ондайда ролі ауысқанымен әркім отбасындағы өз орнын білсе болды. Сонда шаңырақ шаттыққа толып, ерлі-зайыптылар да бақытты болмақ.

 

М. ӘЙІМБЕТ

zamana.kz