ЖОО студенттерінің шәкіртақысы 2025 жылға дейін 2 есе ұлғаяды Мемлекет басшысының тапсырмасы бойынша ЖОО студенттерінің стипендиясы 2025 жылға дейін 2 есеге ұлғайтылады, деп хабарлайды ҚР Ғылым және жоғары білім министрлігінің Telegram каналы.
Ондағы деректерге қарағанда, министрліктің 2026-2030 жылдар аралығындағы жұмысы осы тапсырма шеңберінде жалғасады. Барлық студенттерге білім алу үшін қажетті әлемдік цифрлық ресурстарға қолжетімділік қамтамасыз етіледі.
Өткізілген жұмыс қорытындысы бойынша білім беру бағдарламаларына енгізу үшін өзекті курстар іріктелді. 654 Coursera курсы мен 650 білім беру бағдарламаларының тізімі жасалды және ол 1500 пәнге қолданылуы мүмкін.
«Студенттік жатақханалар салу кезінде мемлекеттік тапсырысты орналастыру мерзімін 8 жылдан 6 жылға дейін қысқарту және жатақханадағы бір орынға мемлекеттік тапсырыстың мөлшерін 122 АЕК-тен 195 АЕК-ке дейін, Алматы қаласы үшін 144 АЕК-тен 230 АЕК-ке дейін ұлғайту арқылы қолданыстағы мемлекеттік-жеке әріптестік тетігін жетілдіру бойынша жұмыс жүргізілуде», - делінген хабарламада.
