2025 жылғы 13 наурыздан бастап Қазақстанда Әкімшілік құқық бұзушылық туралы кодекске енгізілген бірқатар өзгерістер заңды күшіне енді,-деп хабарлайды el24.kz тілшісі. Бұл түзетулер бірнеше саладағы құқық бұзушылықтарға қатысты айыппұлдарды күшейтуді және қоғамдық тәртіпті сақтау тетіктерін жетілдіруді көздейді.

Жол қозғалысы ережелеріне қатысты жаңа айыппұлдар

1. Жолаушыларды дұрыс тасымалдамау

Енді көлік қозғалысы кезінде салонынан тыс жолаушыларды тасымалдауға немесе жолаушылардың терезе не люктен басын шығаруға рұқсат берген жүргізушіге
10 АЕК (шамамен 39 490 теңге) көлемінде айыппұл салынады.

2. Арнайы көліктерге жол бермеу

Жедел жәрдем, өрт сөндіру немесе полиция көліктеріне жол бермегендерге:
– бірінші рет бұзған жағдайда – 20 АЕК (78 980 теңге);
– қайталап бұзса – 40 АЕК (157 960 теңге) немесе 20 сағатқа дейін қоғамдық жұмысқа тарту жазасы қолданылады.

Тұтынушылар құқығын қорғау саласындағы жауапкершілік

Енді кәсіпкерлерге ескерту емес, бірден айыппұл салынады:

• Шағын бизнес субъектілері – 15 АЕК (59 235 теңге);
• Орта бизнес – 20 АЕК (78 980 теңге);
• Ірі бизнес – 25 АЕК (98 725 теңге).

Бұл жаңашылдықтар тұтынушылардың құқықтарын тиімді қорғауға бағытталған.

Еңбек қауіпсіздігіне қатысты айыппұлдар

Еңбек қауіпсіздігі мен еңбекті қорғау талаптарын бұзғаны үшін:

• Лауазымды тұлғалар мен шағын кәсіп иелері – 20 АЕК (78 980 теңге);
• Ірі кәсіпорындар – 120 АЕК (473 880 теңге) көлемінде айыппұл төлейді.

Қоғамдық жұмыс – жаңа жаза түрі

2025 жылдың 1 қыркүйегінен бастап әкімшілік құқық бұзушылық жасаған тұлғаларға қоғамдық жұмыстарға тарту жазасы енгізіледі. Бұл жаза бұған дейін тек қылмыстық істерде қолданылып келген болатын.

Есірткі немесе күшті әсер ететін заттарды қолдану

Медициналық мақсаттан тыс есірткі немесе психобелсенді заттарды қолданғандарға қатысты да жазалар қатаңдатылды:

• Бірінші рет – 40 АЕК (157 960 теңге) немесе 10 тәулікке дейін қамауға алу;
• Қайталанған жағдайда – 80 АЕК (315 920 теңге) немесе 20 тәулікке дейін қамауға алу көзделген.

Жаңа талаптар құқық бұзушылықтардың алдын алып, азаматтардың қауіпсіздігі мен заң алдындағы жауапкершілігін арттыруға бағытталған. Сондықтан заң талаптарын сақтау – әрбір азаматтың борышы.