«Қару ұрлады» деген Абылай Балғынбай туралы мұғалімі пікір айтты

Қару ұрлады делінген кіші сержант Абылай Балғынбайға қатысты ел түрлі пікір білдіріп жатыр.
 
Біреуі сарбаздың «сазайын тартқызу керек» десе, өзгелері «әскери жаланың құрбаны болғанына» сенімді. Абылайды танитындар оның «қару ұрламақ түгілі, тірі жанға зияны жоқ» деп қорғауда.

Тойбек Бейсен, Абылай Балғынбайдың ұстазы: - Көзқарасым – ол бала өте тәрбиелі, тәртіпті. Дәл мынау істеген тірлігін естіген кезде есімізді жинай алмай қалдық.  Ол баланың қолынан ондай тірлік келуі мүмкін емес. Абылайға жала жабылған сияқты боп тұр.
 
Өйткені Абылайдан ондай шығатына сенбейміз, оның ата-анасын да білеміз. Мұғалімдері мен қоса көршілері мақтаған әскери жігіттің ата-анасы тілшілермен мүлдем тілдескісі жоқ. Үйдегі төрт ұл, бір қыздың үлкені Абылай төрт жылдан бері әскери  бөлімде жұмыс істейді екен.
 
Былтырдан бері бөлімше командирі болған кіші сержанттың жұмысында да абыройлы болыпты. Бірақ ел мақтаған жігітті Қорғаныс министрлігі жақтап отырған жоқ. Оның жұмыс орнын өз еркімен тастап кеткенін және тастап қана қоймай, қыруар оғы бар 30 автомат пен 27 тапаншаны «арқалап әкетті» деп дабыл қақты.
 
Кеше күні бойы ізделген ол ақыры кеш бата Алматыдан бір-ақ шыққан. Уатсап месенджерінде тарап жатқан фотоларда онымен бірге бірнеше адам ұсталған сияқты. Тіпті қару мен қомақты қаражатты да байқауға болады. Десе де, кешелі бері елді дүрліктірген оқиғаға бірде-бір министрлік, не ведомство мәлімдеме жасаған жоқ.    

Дереккөз : ktk.kz
 

Қысқатолқынды пешке салуға болмайтын 10 зат

 

Тұрмыста қысқатолқынды пештің пайда болуымен етті тез жібітіп, тамақты бір сәтте-ақ жылытатын болдық. Бұл пештер - заманауи ас үйде таптырмас көмекшіге айналды. Алайда қысқатолқынды пешке 1 минут болсын салып қыздыруға болмайтын заттар болады. Ендеше сол туралы айта отырайық.

Жұмыртқа

Піспеген жұмыртқаны қысқатолқынды пешке салуға болмайды. Себебі жұмыртқаның іші буланып, қабығы жарылып кетеді.

Бояулы ыдыстар

Түрлі-түсті ою және гүлдермен әрленген ыдыстарға тамақ салып, қысқатолқынды пешке жылытуға болмайды. Себебі ыдыстағы бояулар көшуі мүмкін. Сондай-ақ, металл ыдыстармен де тағам ысытуға болмайды. Қыза келе тағамыңызды күйдіріп жіберуі мүмкін.

Фаст-фуд қорапшалары

Фаст-фуд тағамдарын алғанда қорапшаға салып береді. Ал ол қорапшалар алған тағамыңызды жылы қалпында сақталуға аз да болса септігін тигізеді. Десе де қайта жылыту үшін қорапшаларымен қоса қысқатолқынды пешке салуға болмайды. Себебі, қыздырғанда ол қорапшалар адам денсаулығына қауіпті заттар бөледі.

Ыдыс жууға арналған ысқыш

Ыдыс жууға арналған құрғақ ысқышты қысқатолқынды пешке салсаңыз, лезде өртеніп кетеді. Сол үшін сақ болыңыз.

Фольга

Қысқатолқынды пеште тағамды фольгаға орап қыздыруға болмайды. Себебі, фольга тағамға ыстық өткізбей ғана қоймай, тез тұтанады да.

Киім

Тез кептіремін деп қысқатолқынды пешке киім салып жүрмеңіз. Киімдер тез тұтанады.

Қарбыз

Қарбызды ешкім де ысытып жей қоймас. Әйтсе де ысыту үшін салатын болса қарбыз да жұмыртқа секілді буланып, жарылатын болады.

CD диск

Қысқатолқынды пешке дисктерді салуға болмайды. CD диск өртеніп қана қоймай, жарылады да. Сол үшін сақ болғаныңыз абзал.

Брокколи

Бұл өсімдікті қысқатолқынды пеште қыздыратын болсаңыз, 97 % құнарлылығын жояды.

Пластикалық ыдыстар

Қысқатолқынды пеште пластикалық ыдыстармен тамақ ысытуға болмайды. Қызғанда бұл ыдыстардан адам денсаулығына зиян келтіретін заттар бөлінеді.

Дереккөз: Reactor

Димаш Құдайберген жылдың ең көрікті ер адамы атағына ұсынылды

 Қазақстандық әнші Димаш Құдайберген TC Candler 100 Most Beautiful list тәуелсіз сарапшылары нұсқасы бойынша 2020 жылдың ең көрікті ер адамы атағына ұсынылды, деп хабарлайды ҚазАқпарат.
 
Осы сәтте Димаш аталған рейтингінің инстаграм-аккаунтында 6,5 мың лайк жинап үлгерді.

Айта кетейік, ел атынан бақ сынап жатқандардың ішінде Димаш жалғыз емес. Бұл додаға MadMen Q-Pop тобынан Рахат Масақбай, Ninety One тобынан Азамат Ашмақын және әнші Ziruza қатысып жатыр. TC Candler ойын-сауық платформасы жыл сайын әлемнің 100 ең көрікті ер және әйел адамын таңдайды.
 
Автор: Влада Гук.

Қытай коронавирусты қолдан жасалынған ауру дегенге жауап берді

Қытайдың АҚШ-тағы елшісі Цуй Тянькай коронавирус індеті - биологиялық қару деген ақпарат жайлы пікір білдірді, деп хабарлайды Stan.kz ақпарат агенттігі. 

Қытай елішісінің сөзінше, қазіргі күні ауру жайлы айтылып жүрген араңдатушылықтардың саны көп. Олардың бірі - вирус АҚШ немесе Қытайдың зертханасында қолдан жасалған деген ақпарат. 

"Бұл - нағыз сандырақтың өзі", - дейді дейді Тянькай. 

Десек те ол аурудың пайда болған ортасы әлі анықталмағанын айтып кетті. 

"Біздің зерттеушілердің пайымдауынша, ауру бір жануардан жұққан. Бірақ біз әлі зерттеуіміз керек", - деп қосты елші. 

Қытайлық саясаткердің айтуынша, вирус кез келген жерден пайда болуы мүмкін екен. Алайда ғалымдар жағдайды түзету үшін барын салуда дейді ол. 

Атап кетерік жайт, қазір коронавирустан көз жұмғандардың саны 908-ге жетсе, ауруды жұқтырғандардың саны 40,1 мыңнан асыпты. Ауруханадан 3281 адам шығарылған. Бір күннің ішінде індетті жұқтырып, жантапсырғандардың саны 97-ге артыпты.

Салтанат Мадиярқызы : ақындық — таңдап алынбайтын тағдыр

Салтанат Мадиярқызы 1996 жылы, 8-ші қаңтарда Түркістан облысы, Сарыағаш ауданында дүниеге келген. Ақын.Туғаннан ДЦП диагнозымен ауырады. 2014 жылы Кентау қаласында арнаулы кәсіптік колледжінде "Есеп және аудит" мамандығы бойынша білім алған. Қазіргі таңда Шымкент қаласында ОҚПУда дефектология мамандығы бойынша  соңғы курста білім алып жатыр.

- Салтанат өзіңіз жайлы қысқаша айтып өтсеңіз? Қай жердің тумасысыз?

 
 
- Мен Салтанат Мадиярқызы 1996 жылы, сегізінші қаңтарда Түркістан облысы, Сарыағаш ауданында өмірге келдім. Туғаннан ДЦП диагнозы қойылған. 2014 жылы Кентау қаласында арнаулы кәсіптік колледжінің "Есеп және аудит" мамандығын бітірдім. Мамандығым бойынша жеке компаниялардың бухгалтериясында жұмыс істедім. Кейін Шымкент қаласында ОҚПУ-ға дефектологияға оқуға түстім. Бұйырса, биыл бітіремін. 
 
- Сізді  білуімізше  "сегіз қырлы бір сырлы жансыз", қолөнермен айналысасыз, шығармашылығыңыз бір төбе.Тəттілер пісіресіз. Барлығын алып жүру қиын емес пе? Денсаулығыңызға кері əсері жоқ па?
 
- Сүйікті ісіммен айналысқанда демаламын. Бірақ, белгіленген уақыттан асып кетсе, ол да жалықтырады. Денсаулық жағынан ешқандай кері әсері жоқ. Физикалық тұрғыда осы деңгейімді бірқалыпты ұстап тұру үшін күнделікті белгілі бір сағаттарды тренажер залдарға баруға бөлемін. 
 
 
- Тағдырына мойымайтын, үкіметке мен мүгедекпін деп алақанжая беретіндер сияқты емес, тағдырмен тайталасып, өз мүмкіндігіңіздің жоғары екенін, тіпті дені сау адамға жүк болатын  жұмысты  қолға алып жүргеніңіздің өзі біраз адамға үлгі боларлық. Бизнес бастау ойыңызда бар ма? Мысалы қолөнерден?
 
- Бизнес бастау көптен ойда жүрген. Сәті түспеді. Жақында сырғалар жасап бастадым. Бір аптадай болып қалды. Әзірге түрлі түсті киізден (фетр) жасалған қазақша (оюлы) сырғалар сатылымда. 
 
- Сырғадан басқа  тағы  қандай  дүниелеріңіз бар?
 
- Сырғамен бірге алқа, білезік, тәж де бар. Тек, әзірге сатылымда сырғалар ғана. Алдағы уақытта тағы да басқа дүниелер қосылады. 
 
-  Қолдан жасалған бұйымдар  қымбат болады. Сіздің бағаңыз қол жетімді ме?
 
- Қымбат бұйымдар бар. Бірақ, көбісі қарапайым халыққа қол жетімді бағалар.
 
 
- Қолөнермен айналысқаныңызға қанша уақыт болды?
 
- Екі-үш жылдай болды. Бірақ, тұрақты түрде айналысуға енді кірісіп жатырмын. 
 
 
- Қандай тастарды, қандай моншақтарды пайдаланасыз? 
Қолданған əшекей бұйымдарға байланысты бағалары да əртүрлі шығар?
 
- Енді бастап келе жатқандықтан, әзірге әдемі, оңай табылатын тастар, шиша моншақтар, әр түрлі бисерден пайдаланамын. 
 Нарықтағы бағамен салыстырғанда бисерден және моншақтан жасалған сырғалар мен білезіктерім арзан. Сатып алушылар бағасына қарамай, ұнатқанын еркін таңдай алуы үшін бағаларын бірдей етіп жатырмын. Бағалары қол жетімді.
 
 
 
- Сіздің  шығармашылықпен айналысатыныңыздан да, ақындығыңыздан да хабарымыз бар. Ақын болу азап па, бақыт па? 
 
- Ақын болу азап та, бақыт та емес. Бұл да бір жауапкершілік. Меніңше, ақындық — таңдап алынбайтын тағдыр. 
 
- Қандай кітабыңыз жарық көрді? Қай жылы? Қанша өлеңіңізге əн жазылды?
 
- Алғашқы жинағым алты жыл бұрын жарық көрген. Көңілім толмағандықтан ол жайлы айтпаймын. 
  Әнге сөз жазбайтын, өлеңдеріне ән жаздыруға да рұқсат етпейтін адам едім. Соңғы кездері ол ойымды өзгерттім. 4-5 өлеңіме ән жазылған. Әлі де жазылып жатыр. 
 
- Тəттілер пісіру хоббиыңыз ба? Саудаға шығарып көрдіңіз ба? 
 
 
- Иә, тәттілер пісіру хоббиларымның бірі ғана. Рулет, кекс, печенье, торт, булочка, пицца пісірген ұнайды. Бірақ, оларды саудаға шығаратын ойым жоқ. Олар өзіміз үшін. 
 
- Болашақта шығармашылықта қандай жоспарыңыз бар? Қандай тың идея ойлап жүрсіз?
 
- Алдағы уақытта поэзиямен қатар прозалық шығармаларымды да оқырмандарға ұсынамын. Оқып, бағасын берерсіздер. 
 Кей идеяларымды жүзеге асыруға кірісіп те кеттім. Нәтижесі ойдағыдай болып жатса, бөлісермін.
 
- Əлеуметтік желіде ерке, еркін Салтанат өмірде қандай?
 
- Желідегі еркелік пен еркіндігім жоқ емес. Бірақ, өмірде сөзге сараңдау, байсалдымын. Виртуальда біраз уақыттан бері білетін кісілер кездескенде "фейсбукте сайрайсың ғой?!" деп жатады (күліп). 
 
- Сөзіміздің басында "сегіз қырлы ,  бір сырлы" деп айтып кеттік. Осындай бәрі қолынан келетін қыздың,жүрегінің иесі бар ма? 
 
- Кезінде ғашық болу, сезімді жырға қосу өтті ғой. Бірақ, әлі өз адамымды кезіктірмедім.
 
 
 
- Көзіңізге жиі жас аласыз ба? Сізді не толқытуы мүмкін?
 
- Эмоцияларымды басқара алатын адаммын. Көз жасыма стоматолог қана куәгер болған шығар. (күлді) 
 Кейде кей әзілдердің өзіне отыра қалып, еңірегім келеді. Адамдардың қатігездігі де шошытады. 
 
- Қоғамда адамдардан жиі теперіш көресіз бе? 
 
- Жиі деп айта алмаймын. Арасында болып тұрады. Елемеуге тырысамын. 
 
- Шығармашылық, қолөнер, фитнес, тəтті пісіру мүның бəріне қайдан уақыт табасыз? 
 
- Уақытты тиімді, дұрыс жоспарлап, жоспармен жұмыс істеп, бәріне үлгеруге болады. Бірақ, кейде өзім де үлгермей, жоспар өзгеріп кетеді.
 
 
 
- Өмірде ақымақтан гөрі ақылдылар көбірек таяқ жейді. Келісесіз бе?
 
- Келісемін. Бала күнімде өзімнен үлкен балалармен таласып қалсам, үлкендер "сенің ақылың бар ғой, қоя салшы" дейтін. Сонда әлі мектепке де бармайтынмын. "Неге өмір ақылды болғаныңа ақы алады?" деп сол кезден ойлаймын.(жымиып) 
 
- Біздің оқырмандарға не айтар едіңіз?
 
Сайт ұжымына, оқырмандарына адамдық биігінен құлатпайтын мағыналы ғұмыр, үлкен мақсаттарға жеткізер табандылық, ізденіс, тұрақтылық, сәттілікке толы күндер тілеймін! Армандарыңыз аласармасын! 
 
- Рақмет !Жақсы сұхбат болды. Шынайы жауап бергеніңіз үшін рақмет !  Табысты болыңыз!
 
Салтанаттың  жасаған сырғаларын көріп, бағалап, тапсырыс беру үшін https://instagram.com/saltanat_accessories?igshid=11jd35q62sf75 инстаграм парақшасына жазылуды ұмытпаңыздар! 
 
Сұхбатты дайындаған :  Исенбай Мәдина

Алматыда іс-түссіз жоғалып кеткен үш оқушы өлі күйінде табылды

Алматыда жоғалып кеткен үш жеткіншек суға батып кеткен, деп хабарлайды Stan.kz ақпарат агенттігі.

Бұл туралы қала басшысы өзінің Facebook парақшасында жазды. 

«Құтқару қызметтері Алатау ауданында жоғалып кеткен оқушыларды іздестіруді аяқтады. Өкінішке орай, біз балалардан айырылып қалдық. Денис Мельников, Вадим Сизов, Сабыр Дүйсеғалиевтің қаза тапқаны туралы қайғыра хабарлаймын»,– деп жазды Бақытжан Сағынтаев.

Қала басшысының айтуынша, оқушылар ойнап жүріп, мұзы еріп жатқан суға батып кетіпті.  

«Жазым болған оқушылардың отбасылары мен жақындарының қайғыларына ортақтасып, көңіл айтамын. Біздің балалар мұзы жұқа су айдынында көз жұмды. Полиция департаменті мен ТЖ қызметтеріне себептерін тергеу жөнінде арнайы топ құруды тапсырдым. Зардап шеккендердің отбасыларына қолдан келгенше көмек көрсетеміз. Тергеу барысы менің жеке бақылауыма алынды»,- деді әкім.