el24.kz Ақтөбе облысының Хромтау ауданында орналасқан Дөн тау-кен байыту комбинатында түнгі ауысым кезінде төтенше жағдай орын алды. Кәсіпорынға қарасты «Болашақ» шахтасында жарылыс болып, салдарынан үш жұмысшы ауыр жарақат алды.

Оқиға 2025 жылдың 27 мамырына қараған түні, сағат 01:30 шамасында тіркелген. Жарылыс жұмыстары кезінде кенеттен от тұтанып, шахтада болған бірнеше қызметкер түрлі дәрежеде күйік шалып, ауруханаға жеткізілді.

Ақтөбе облыстық денсаулық сақтау басқармасының мәліметінше, зардап шеккен үш жұмысшының екеуі жансақтау бөліміне жатқызылған. Олардың жағдайы ауыр. Ал үшінші жұмысшы орташа ауыр хәлде ем қабылдап жатыр. Жедел жәрдем бригадасы оқиға орнына дереу жетіп, алғашқы медициналық көмекті көрсетті.

Қазір шахта жұмысы уақытша тоқтатылды. Оқиға орнына төтенше жағдайлар департаментінің мамандары мен құқық қорғау органдары тартылып, жарылыстың себептері мен қауіпсіздік талаптарының сақталуына байланысты тергеу амалдары басталып кетті.

Ақпарат үшін:
Дөн тау-кен байыту комбинаты — Қазақстандағы ең ірі хром кендерін өндіретін кәсіпорындардың бірі. Комбинат құрамында бірнеше шахта мен кен байыту фабрикасы жұмыс істейді. Елдің индустриалдық даму бағдарламасында маңызды орын алатын бұл нысанда мыңдаған адам еңбек етеді.

Оқиғаға қатысты нақты деректер мен жауапты органдардың ресми мәлімдемесі жарияланған соң, толық ақпарат қосымша хабарланатын болады.