ҚЫЗҒАЛДАҚ ҚЫЗ

Болмайды екен дүние жалған бақсыз,
Сәулесіне үміттің жалғанбақпыз!
Сізді көріп көңілім жадырады,
Көріктісі көктемнің қызғалдақ қыз!

Қызғалдақ қыз, ғажайып қызғалдақ қыз!
Қайдан келіп қыратқа қонған бақсыз?!
Қырдың қызыл қырмызы жұпар гүлі,
Сіздей сұлу жақсыны армандаппыз!

Қырмызы гүл көз тартып құлпырасың,
Жан жүрегім, сен неге бұлқынасың?!
Маңдайыңнан иіскейін, тиіспейін,
Сай-сүйегім мейілің сырқырасын.

Қызғалдақ қыз, ғажайып қызғалдақ қыз!
Қайдан келіп қыратқа қонған бақсыз?!
Қырдың қызыл қырмызы жұпар гүлі,
Сіздей сұлу жақсыны армандаппыз!

МАХАББАТ ПЕН МЕЙІРІМ

Өмір өзен ағысы зор иірім,
Адамдардың жұтып жатыр пейілін.
Жанарларға қарай берем жаутаңдап,
Көрем бе деп махаббат пен мейірім.

Құндылықтар құбылды да кей ұғым,
Арзандады, еңкіш тартты иығым.
Жер бетінде қалды ма екен қылаудай,
Мен іздеген махаббат пен мейірім?

Кие алмай тақуалық киімін,
Адастырдық абаданның үйірін.
Тау-тас кезіп іздеп жүрміз таба алмай,
Қайда кетті махаббат пен мейірім?

Тіршіліктің түсіне алмай түйінін,
Аралаймыз қаралай біз қиырын.
Адастырып кеткендей ме шынымен,
Қай жақта жүр махаббат пен мейірім?

Қайыршыдай санап теңге, тиынын,
Қорек қылып қара нанның түйірін.
Қара судан жұтып қойып, өмірім
Өтіп жатыр, салмайды көз қиығын
Мен іздеген махаббат пен мейірім.

Мен іздеген махаббат пен мейірім,
Жоғалған соң жабырқатты жиі мұң.
Лүпілі жоқ тас жүректе тарсыл көп,
Өмір бақи іздеп өтем мейілің.

Күмбірлейді көңілімнің күйі мың,
Көтерілер күн туа ма иығым?
Арып-ашып іздеп жүрмін, көзіңе
Түспеді ме махаббат пен мейірім?

ҚАНДАЙ ТӘТТІ АЗАБЫМ АРҚАЛАҒАН

Сен неткен бақыттысың бақыт құсым?!
Арамызға салса да уақыт күшін.
Айлар, жылдар кедергі емес екен,
Мен сияқты Мәжүнін ғашық үшін.

Махаббаттан мәңгірген бас екенмін,
Жүректен аққан ғазал жас екенмін.
Ләйлісін көрмей сүйген ессіз ғашық,
Сәжде деп ізін сүйген тас екенмін.

Сезімнен сергелдең күй кешіп келем,
Хикаят мол менде ел есітпеген.
Бір Өзіңді мәңгіге сүйіп, күйіп,
Сүйіктілер еліне көшіп кетем!

Қандай тәтті азабым арқалаған,
Сетінеп сөгілмеген, тарқамаған.
Мен бір кебін киіппін пәк сезімнен,
Қажет емес оқалы қамқа маған!
Осы күйім мың артық Жар қалаған!
Шүкір!

МЕН - ӨЛЕҢМІН

Мен - Өлеңмін!
Сарқылмайтын сырмын мен!
Мен - Өлеңмін!
Таусылмайтын жырмын мен!
Мен - Өлеңмін!
Таңсәрімін!
Жарықпын!
Шұғылалы ақ шуақпын!
Сауып нұр,
Дүниеге сөзбен жылу таратам!
Жүрегімнің жанарынан жауһар жыр,
Сендер үшін!
Сендер үшін жауып тұр!
Алыңыздар,
Қалыңыздар алып гүл!
Жұпар шашқан хош иіске елітіп,
Өне бойды сұлулыққа емінтіп,
Жан сарайды сырқатынан сауықтыр!
Мен - Өлеңмін!
Өмірлерге өлеңсіз,
Өңірлердей кеуіп, семіп, сусаған
Төніп,
Қауіп тұр!
Мен - Өлеңмін!
Оқы мені, шуақтан!
Күш-жігер ал,
Қуаттан!
Болмысыңды,
Өр пішінді алып қыл!
Қане!
Туған дала,
Туған ауыл,
Жазық қыр!
Мұқағали өлеңіндей өрлікпен,
Мол мейірім,
Махаббатпен ел күткен!
Жүректерден - жүректерге жетейін,
Баршаңызға тегін қызмет етейін!
Парызымды перзенттік,
Осылай бір өтейін!
Белім буып,
Намыс деген белдікпен!
Керімсалдай самал болып есейін,
Батыс - Шығыс!
Оңтұс - Солтұс ендіктен!
Мен бір Өлең!
Мен Өлеңмін осындай!
Жаным ада,
Кемдіктен!
Менде бары:
Ғашықтық!
Махаббат!
Шапағат!
Және
Шейіт болу -
Ерлікпен!