el24.kz 2025 жылғы мамыр айының басында Каспий теңізінің жағалауында тағы бір экологиялық қасірет тіркелді.

Маңғыстау облысының Түпқараған ауданындағы теңіз жағалауынан Қазақстанның Қызыл кітабына енген 88 Каспий итбалығының (Pusa caspica) өлексесі табылды. Бұл туралы облыстық экология департаменті хабарлады.

Мамандардың айтуынша, батыс бағыттағы жел салдарынан итбалықтар жағалауға шығып қалған. Алайда табылған денелердің шіру деңгейі өте жоғары болғандықтан, нақты өлім себептерін анықтау мүмкін болмай отыр. Мамандар олардың өлгеніне 2–3 апта өткен болуы мүмкін екенін айтады. Барлық өлексе арнайы полигонда жойылды.

Қазіргі уақытта мамандар өлекселердің неден қырылғанын анықтау үшін зертханалық сараптама жүргізіп жатыр. Итбалықтардың өлекселері негізінен Ақшұқыр ауылы мен Форт-Шевченко қаласының маңынан табылған.

Департамент өкілдерінің айтуынша, өлекселердің сыртқы қабатында зақымдану белгілері байқалмаған, сондықтан су жануарларының жаппай қырылуына нақты не себеп болғаны әзірге белгісіз.

Еске салсақ, Каспий итбалығы әлем бойынша тек осы теңізде ғана мекендейтін, сирек әрі ерекше түр болып табылады. Соңғы жылдары олардың популяциясы күрт азайып, Қазақстан мен Ресей тарапынан қорғауға алынып отыр. Мамандар экологиялық апаттың себептері ретінде теңіз суының ластануы, түрлі жұқпалы аурулар немесе табиғи факторларды атап өтеді.

Тиісті органдар жағалау бойында тұрақты мониторинг жүргізіп, жағдайды бақылауда ұстап отыр. Қоғамдық ұйымдар мен жергілікті тұрғындар билік тарапынан бұл мәселені мұқият зерттеп, итбалықтарды қорғау бойынша нақты шаралар қабылдауын талап етуде.

Экологтар Каспий итбалығының популяциясын сақтау үшін халықаралық деңгейде ынтымақтастықты күшейтіп, табиғи ортаны қорғау жұмыстарын жүйелі жүргізу қажеттігін алға тартуда.

Бұл жағдай қоғамда үлкен алаңдаушылық туғызып отыр. Табиғат жанашырлары мен сарапшылар экожүйенің тепе-теңдігін сақтау мақсатында шұғыл әрекет ету қажет екенін айтуда.