Полиция ересектердің қарауынсыз ойын-сауық мекемесіне жасөспірімдерді кіргізген 25 кәсіпкерді жауапкершілікке тартты.
«Полицияға Павлодардағы Чокин көшесінің бойындағы аулада жасөспірімдердің шулап жатқанын хабарлап, бір әйел қоңырау шалған.
Сол жерге барған полицейлер полиция бөліміне жасөспірімдер мен олардың ата-аналарын жеткізді. Нәтижесінде, олар ҚР Әкімшілік құқық бұзушылық кодексінің 442-бабы 2-бөлігі бойынша жауапқа тартылды. Балалармен, олардың ата-аналарымен профилактикалық әңгімелесу жүргізілді», - деп хабарлайды el24.kz тілшісі, Павлодар облыстық ПД баспасөз қызметіне сілтеме жасап.
2022 жылдың басынан бастап Павлодар облысында полиция балаларды тәрбиелеу, білім беру және олардың құқықтарын қорғау жөніндегі міндеттерін орындамағаны үшін 200-ге жуық ата-ана және заңды өкілді жауапқа тартты.
«2022 жылдың 5 айында балалардың түнгі уақытта ойын-сауық мекемелерінде және тұрғын үйден тыс жерде заңды өкілдерінсіз жүргені үшін 1029 ата-ана жазаға тартылды. 25 ойын-сауық мекемесінің иесі жасөспірімдерді ересектерсіз кіргізгені үшін жауапкершілікке тартылды», - деді ведомстводан.
