el24.kz Айға бағытталған Artemis II миссиясы барысында экипаж мүшелері күтпеген техникалық қиындыққа тап болды. Ұзақ сапар кезінде зымыран ішіндегі маңызды жүйелердің бірі – дәретханада ақау тіркелген.

NASA өкілдерінің мәліметінше, 10 күндік ұшуға есептелген санитарлық құрылғы әуеге көтерілгеннен кейін көп ұзамай істен шыққан. Ақау зәр жинау жүйесінде анықталған. Бұл, сырт көзге қарапайым көрінгенімен, ғарыштағы тіршілікті қамтамасыз ететін аса маңызды элементтердің бірі болып саналады.

Дегенмен құрылғы толық істен шықпаған. Ғарышкерлер оны қатты қалдықтар үшін пайдалануды жалғастырған, ал басқа қажеттіліктерді уақытша балама тәсілдер арқылы шешуге мәжбүр болған.

Экипаж бірнеше сағат бойы Жермен байланыс орнатып, мамандардың нұсқаулығымен ақауды жою жұмыстарын жүргізді. Нәтижесінде жүйе қалпына келтіріліп, қалыпты жұмыс режиміне қайта қосылған.

NASA дерегіне сәйкес, қазіргі уақытта экипаж төрт сағаттық демалысқа шыққан. Одан кейін олар миссияның келесі кезеңіне – орбитаның ең төменгі биіктігін арттыруға бағытталған дайындық жұмыстарын жалғастырады.

Аталған жағдай ғарыштық миссияларда ең ұсақ жүйенің өзі үлкен маңызға ие екенін тағы бір рет көрсетті.