Тәуелсіздік мейрамында бір күн ғана демалыс беріледі

 

ҚР Еңбек және халықты әлеуметтік қорғау министрлігі 16 желтоқсан – Тәуелсіздік мерекесіне неше күн демалыс берілетініне қатысты түсініктеме берді.

«Биыл 16 желтоқсан аптаның жұма күніне түсіп тұр. Сондықтан, бір күн демалыс беріледі, әрі қарай сенбі-жексенбі күндері әдеттегі демалыс болады.

Ешқандай демалыс күндері ауыстырылмайды», - деп жауап берді министрліктің баспасөз қызметі агенттік сауалына. Бұған дейін 25 қазан – Республика күніне орай қазақстандықтар 3 күн қатарынан демалады деп хабарланған болатын.

Онда демалыс күнін 22 қазан сенбіден 24 қазан дүйсенбіге ауыстыру жоспарлануда. Осылайша, қазақстандықтар 23-25 қазан күндері демалады. «Бұл әзірге қаулы жобасы ғана, әлі ешнәрсе нақтыланбаған. Бұл құжат Ашық Үкімет сайтында 10 күн болуы керек, 10 күннен кейін күшіне енеді. Әзірге, Премьер-Министр бұл құжатқа қол қойған жоқ», - дейді министрліктің баспасөз қызметі.

Ақтөбеде жол апатынан ресейлік азамат қаза тапты

 

Самара-Шымкент тасжолында жол апаты болып, ресейлік азамат көз жұмды.
Самара-Шымкент тасжолының 999-шақырымында жол-көлік апаты болды. Toyota Camry автокөлігінің 38 жастағы жүргізушісі, Ресей Федерациясының азаматы Әйтеке би ауданы Аралтоғай ауылы маңында жол жиегіне шығып кетіп, көлігі аударылып қалған.

«Жол-көлік оқиғасы салдарынан 34 жастағы жолаушы сол жерде көз жұмып, 1983 жылы туған екінші жолаушы Әйтеке би ауданының орталық хирургиялық бөлімшесіне жатқызылды.

Қазіргі кезде Қылмыстық кодекстің 345-бабы 3-бөлігі бойынша сотқа дейінгі тергеу басталды. Полиция департаменті жүргізушілерге жол-көлік оқиғаларына жол бермеу мақсатында қозғалыс ережелері талаптарын сақтауға және жүргізушілерге шаршаған немесе ауырған жағдайда көлікке отырмауға кеңес береді», - деп хабарлады облыстық ПД баспасөз қызметінің жетекшісі Ерболат Сарқұлов.

КТК телеарнасы

Kaspi.kz, Денсаулық сақтау және Цифрландыру министрлігі анықтама алу сервисін іске қосты

 

 «Фтизиатрия» фтизиопульмонология орталығынан туберкулезбен ауыратын науқастардың диспансерлік есепте тұрғаны немесе тұрмағаны туралы;

Психикалық денсаулық орталығынан науқастарды динамикалық бақылау (не динамикалық бақылаудың жоқтығы) туралы;

«Наркология»психикалық денсаулық орталығынан наркологиялық науқастарды динамикалық бақылау (не динамикалық бақылаудың жоқтығы) туралы анықтамаларды алуға болады, олар жұмысқа орналасқанда немесе оқуға түскенде, жүргізуші куәлігін алғанда немесе виза алғанда қажет болады.

Kaspi.kz-тің басшысы әрі негізін қалаушылардың бірі Михаил Ломтадзе:

«Біз үздік Kaspi.kz қосымшасы арқылы қазақстандықтардың мемлекеттік қызметтерге қол жеткізу деңгейін кеңейте бермекпіз. Цифрлық даму министрлігімен және Денсаулық сақтау министрлігімен бірлесіп, тағы бір тамаша сервисті іске қостық. Енді сүйікті клиенттерімізге анықтама жинауға уақыт жұмсаудың қажеті жоқ. Енді оларды тура үздік Kaspi.kz қосымшасында онлайн режимде алуға болады. Бұл – мемлекет пен бизнестің қазақстандықтардың күнделікті міндеттерін шешуді жеңілдету үшін күш біріктіруінің тағы бір табысты мысалы».

Цифрлық даму министрі Мусин Бағдат:

«Азаматтар цифрлық технологиялардың барлық артықшылықтарын пайдалануы үшін қазақстандықтардың арасында танымал Kaspi.kz сервисі жетілдіріліп, көптеген құжаттармен толықтырылуда. Естеріңізде болса, бұрын жұмысқа орналасқан кезде немесе жүргізуші куәлігін алу үшін 3 жерге барып, психо-, наркодиспансерлерден, туберкулез орталықтарынан анықтама жинау керек болатын. Енді мұның бәрін Egov mobile қосымшасында бір-екі рет басып қана алуға болады. Бұрын да айтып өткеніміздей, алушыларға ыңғайлы болу үшін біз басқа қауіпсіз сервистермен бөлісеміз. Бүгінгі таңда бұл мәліметтер Kaspi.kz-те қолжетімді. Біз мемлекеттік қызметтерді барынша ыңғайлы пайдалану үшін және алу үшін ірі қаржы институттарымен және жетекші технологиялық елдермен жемісті ынтымақтастығымызды жалғастырамыз».

Денсаулық сақтау вице-министрі Есенбаев Бейбіт:

«Қазақстан Республикасы Денсаулық сақтау министрлігі әртүрлі платформалар арқылы азаматтардың денсаулық жағдайы туралы қажетті мәліметтерді ұсыну тәсілдерін көбейтіп жатыр. Азаматтарға ақпарат беру үшін мәліметтер мен платформалардың тізбесін одан әрі кеңейтуге дайынбыз. Осы платформада іске қосу – азаматтарға мәліметтерді беру кезеңдерінің бірі. Біз азаматтардың өздерінің медициналық деректеріне қол жеткізу құқықтарын іске асырамыз».

Алынған анықтамалар Kaspi.kz қосымшасындағы «Мемлекеттік қызметтер» → «Цифрлық құжаттар» бөлімінде қолжетімді болады».

Анықтамаларды көруге, жүктеп алуға немесе қажетті адресатқа электрондық поштамен немесе мессенджермен жіберуге болады.

Kaspi.kz суперқосымшасын 12 миллионнан астам қазақстандық ай сайын пайдаланады.«Мемлекеттік қызметтер» бөлімі арқылы қазақстандықтар өздерінің цифрлық құжаттарына қол жеткізе алады, көлікті қайта тіркейді, жәрдемақы алады, салық төлейді, жүргізуші куәлігін ауыстырады және бизнесін тіркейді.

365info.kz

Қазақстанда жаңадан үш партия құрылып жатыр

 

Қазақстанда жаңадан үш партия құрылып жатыр Одан бөлек, 13 партияны тіркеу өтініші қаралу үстінде.


Бұл туралы ҚР Әділет министрі Қанат Мусин мәлім етті. «Бүгінде 3 партия тіркеу рәсімінің бірінші кезеңінен өтті.

Қазір болашақ партиялар съезді өткізу және партия активін қалыптастыру сатысында. Қолданыстағы заңға сәйкес, партияны тіркеу үшін оның құрамында кемінде 20 мың партия мүшесі болуы керек.

Сонымен қатар еліміздің әр өңірінде кемінде 600 партия мүшесі болуы тиіс», - деді Қанат Мусин орталық коммуникациялар қызметі алаңында өткен баспасөз мәслихатында. Министрдің айтуынша, бүгінде «Халық дербестігі» партиясы съез өткізіп, өз мүшелерінің тізімін ұсынды.

Одан бөлек «Намыс» және «Байтақ» партиясы съез өткізу сатысында тұр. «Тіркелуге ниетті басқа да партиялар бар. Бірақ олар тіркелу рәсімінен өткен жоқ. Себебі олардың құжаттары заң талаптарына сәйкес келмейді.

Жалпы 2019 жылдан бастап 18 саяси партия ретінде тіркеуді сұраған хабар келіп түсті. Тек 2019 жылдың өзінде 5 партия өтініш берді.

Бірақ бүгінде олардың өтініші күшін жоғалтты. Енді 13 партия бар, оның 3-і туралы жоғарыда айтып өттім. Қалған партиялар бойынша ұйымдастыру процесі жүріп жатыр», - дейді ол. Дереккөз: ҚазАқпарат

«Құрбан болудан шаршадым, өзгергім келеді» 

 

Күйеуіммен азаматтық некеде тұрамын, арамызда екі жасар қызымыз бар. Танысқаннан кейін бір айдан соң, енші алып, бөлек шықтық. Араға тағы бір ай салып, құрсақ көтергенімді білдім. Дәрігерлер бұған дейін сәби сүйе алмайтындығымды айтып еді, ал енді…
 
Бұл жаңалық жолдасымды қуанта қоймады. Ол мені әдейі жүкті болды деп ойлады. Екіқабат кезімде бір емес, бірнеше мәрте көзіме шөп салды.

Тіпті қазірдің өзінде оның адалдығына күмәнім бар, тек ол туралы тым көп ойға берілмеуге тырысамын. Екі жыл бойы қызғаныш өзегімді өртегені рас, кейін кешірім беріп, қолымды бір сілтедім.
 
Күйеуімнің маған немқұрайлы қарайтынын түсініп те, көріп те жүрмін. Жыныстық қатынасқа да өзім тартамын. Жақында ұрысып қалған болатынбыз, бұрын барлық мәселелерді сөзбен шешетінбіз. Ал бұл жолы екеуміз де қатты айғайласып, арты жанжалға ұласты. 
 
Кеткім келетіні рас, алайда жүрегімде әлі де «егер бәрін түзетуге болатын болса ше?» деген үміттің сәулесі бар. Ер азаматыма деген сезімімді де түсінуден қалдым, алайда басқа барар жер, басар тауым да жоқ. Өзімнің жеке баспанам да жоқ, анаммен де бірге тұра алмаймын. Ол кісі мені айыптап, бетіме басып отыратын болады. Өзімді өмірде еш жолы болмаған, түкке тұрғысыз адамдай сезінемін.
 
Хатымды қайта оқып шығып, құрбан екенімді ұқтым. Сізден көмек сұраймын, айтыңызшы, өзгеріп, өз бетіммен тығырықтан шығудың жолын таба аламын ба?
 
Лейла, 26 жаста

Ресейлік телеарналар Қазақстанда хабар таратуын тоқтатпақ

 

«Билайн» компаниясы Қазақстан аумағында ресейлік ақпараттық телеарналардың трансляциясын тоқтату туралы шешімге келді.

Бұл туралы компанияның ресми сайтында жарияланды.  
Мәлімет бойынша, 5 қазаннан бастап олар еліміздің аумағында көрсетілмейді.

«Дом кино», «Победа»,«О!», «Первый канал СНГ», «НТВ МИР», «Карусель International», «Россия 24»,«Музыка Первого», «РТР Планета», «Время: далекое и близкое», «Телекафе», «Поехали», «Дом кино Premium HD», «Бобёр»,«Россия К» арналары көрсетпейді», — делінген хабарламада.

Олардың орнын «Еврокино», «Любимое Кино», «1HD music» және «Еда Премиум HD» арналары баспақ.

kaz.caravan.kz